झापा : मोरङको विराटनगरमा मुख्य कार्यालय रहेको तुलसी बहुमुखी सहकारी संस्थाले दमकमा सञ्चालन गरेको सेवा केन्द्रसहित डिपार्टमेन्ट स्टोर पुन सञ्चालन गर्न सहकारीका पीडित पक्षसँग २३ बुँदे सहमति भएको छ ।
दमक-९ मा रहेको सो सहकारी संस्थाको सेवा केन्द्रले बचतकर्ताको रकम फिर्ता गर्न नसकेपछि लामो समय देखि सेवा केन्द्रसहित गार्डेनमार्ट डिपार्टमेन्ट स्टोर बन्द छ ।
बचतकर्ताको रकम क्रमिक रूपमा फिर्ता गर्ने विभिन्न योजनासहित सहकारीका तर्फबाट समन्वयकर्ता ऋषिराज ढुङ्गाना सन्तोष र बालमुकुन्द कपालीसहितको टोलीसँग बचत तथा निक्षेपकर्ताका तर्फबाट प्रतिनिधि सँग लिखित रूपमै २३ बुँदे सहमति भएको हो ।
सो सहमतिको रोहबरमा दमकका नगर प्रमुख, इलाका प्रशासन कार्यालय दमकका प्रतिनिधि इलाका प्रहरी कार्यालय दमकका प्रमुख र दमक उद्योग वाणिज्य सङ्घका अध्यक्ष रहेका छन् ।
लिखित रूपमै २३ बुँदे सहमति भएपछि बन्द रहेको सेवा केन्द्रसहित गार्डेनमार्ट डिपार्टमेन्ट स्टोर खुल्ने भएको छ । सहमति भएसँगै तुलसी सहकारी पीडित परिवार दमकका संयोजक तिलक पराजुलीले फागुनदेखिको निरन्तरको संर्घषले नै यो अवस्थासम्म आइपुगेको भन्दै खुसी व्यक्त गरे ।
विभिन्न योजना सहित पटक-पटक दमकमा भएको छलफलले सार्थक पाएको भन्दै सहकारीका समन्वयकर्ता ऋषिराज ढुङ्गाना सन्तोषले कार्यालय खोलेर सरसफाइ तथा आन्तरिक व्यवस्थापन सम्पन्न गरेर १५ दिनपछि निरन्तर सेवा प्रारम्भ गर्ने जानकारी दिए ।
उनले दमकपछि चाँडै नै उदयपुरको गाईघाट, मोरङको लेटाङ, विराटनगर र सिराहाको गोलबजारमा देखिएको समस्या पनि हलगर्दै लैजाने जानकारी दिए ।
उनले सबैतिरका सेवाग्राहीहरूलाई नआत्तिन र धैर्य गर्न अनुरोध समेत गरेका छन् । केही समय लागे पनि ढिलै भए पनि समस्या समाधानका लागि आफूहरू निरन्तर लागि परेको उनको भनाइ छ ।
