इटहरी : नेकपा एमाले निकट विद्यार्थी सङ्गठन अनेरास्ववियुको नेतृत्वमा जनता बहुमुखी क्याम्पस प्रमुखको कार्यकक्षमा ३ महिना देखीको तालाबन्दी जारी छ । कर्मचारी नियुक्ति प्रक्रियामा चलखेल भएको भन्दै विद्यार्थी सङ्गठनले तालाबन्दी गरेका हुन् । 

सञ्चालक समिति र क्याम्पस प्रशासनको मिलेमतोमा चलखेल गरेर आफ्ना मान्छे भर्ती गर्न खोजेको भन्दै अनेरास्ववियु लगायत विद्यार्थी सङ्गठनले विरोध जनाएका छन् । लिखित तथा मौखिक परीक्षा एकै दिन राख्ने देखी विज्ञहरू राजनैतिक पार्टीमा आबद्ध कार्यकर्ता भएको उनीहरूको आरोप छ । 
सोही विषयलाई लिएर चरणबद्ध सुरु भएको आन्दोलन तालाबन्दी सम्म पुगेको हो । लामो समय तालाबन्दी खोल्न क्याम्पस प्रशासन र सञ्चालक समितिले वास्ता नगरेको अनेरास्ववियुका प्रारम्भिक कमिटी अध्यक्ष उज्ज्वल सिग्देल बताउँछन् । अहिलेसम्म कर्मचारी नियुत्ती प्रक्रिया खारेज भएको कुनै पनि सूचना नआएकोले आन्दोलन जारी रहेको उनले प्रस्ट पारे । 
सेटिङमा भएको कर्मचारी नियुत्ती प्रक्रियामा अध्यक्षको संलग्नताको बारेमा उहाँ स्वयम् उत्तर दिनुपर्ने उनको धारणा छ । पुरानो प्रक्रिया खारेज गरेर आवश्यक भएका मात्र कर्मचारी नियुक्तिको प्रक्रिया नयाँ प्रक्रिया अगाडी बढाउनुपर्ने उनले बताए । 
सञ्चालक समिति सदस्य प्रमोद भट्टराई विद्यार्थी सङ्गठनले हठ त्याग्नुपर्ने तर्क गर्छन् । तालाबन्दी गरेको कारण अख्तियार दुरुपयोग अनुसन्धान आयोगलाई आवश्यक कागजात उपलब्ध गराउन नसकिएको उनले बताए । अख्तियारमा समेत उजुरी परेको कारण अब आवश्यक अनुसन्धान सोही निकायबाट हुने उनको भनाई छ । 
लामो समय क्याम्पसलाई अनिर्णयको बन्दी बनाउने काममा अध्यक्ष स्वयम् र विद्यार्थी सङ्गठन लागिपरेको उनले प्रस्ट पारे । अझै एक साता भित्रमा अध्यक्षको कुनै पहल नभए बहुमतको आधारमा उपाध्यक्षको नेतृत्वमा बैठक बसेर नयाँ प्रक्रिया अगाडी बढाइने उनले चेतावनी दिएका छन् । 
अध्यक्ष भण्डारीले कुनै ठुलो कुरा नभएको प्रतिक्रिया दिए । सबैलाई चित्त बुझाउने ब्रम्हास्त्र कसैसँग पनि नभएको बताउँदै उनले बिस्तारै समस्या समाधान हुने बताए । 
विद्यार्थी आन्दोलनको विषयमा उनले भने, ‘तपाईँहरू किन यती सानो कुराको पछि लाग्नुहुन्छ ? त्रिभुवन विश्वविद्यालय १४९ दिन ताला लागेको हैन ? ६ हजार विद्यार्थी भएको क्याम्पस हो, कहिले ताला लाग्छ कहिले खुल्छ । कतिपय कुराहरू पर्खिनुपर्ने हुन्छ । पठनपाठन र प्रशासनिक काममा कुनै समस्या छैन । यसका पछि नलाग्नुस् तपाईँहरू ।’
ताला लाग्नुको आफ्नो कुनै कारण नभएको बताउँदै उनले अन्य कुनै कारणले ताला लागेको बताए । अब बिस्तारै सहमति भएपछि ताला खुल्ने उनले सुनाए । हाल क्याम्पस बन्द भएकाले खुलेपछि वार्ताद्वारा समस्या समाधान गरिने उनको भनाई छ । 
अहिले क्याम्पस अध्यक्ष रेवतीरमण भण्डारी मङ्सिर ४ मा हुने प्रतिनिधिसभा निर्वाचनको तयारीमा जुटेका छन् । सुनसरी २ (१) बाट प्रदेशसभाको उम्मेदवार भएका उनले नेकपा माओवादी केन्द्रका उम्मेदवार द्धारिकलाल चौधरी सँग प्रतिस्पर्धा गर्नुपर्ने भएको छ ।