धरान : कोशी प्रदेश सरकारले कर्मचारी दैनिक खाजा भत्ता शतप्रतिशत वृद्धि गर्ने निर्णय गरेको छ।
आज (२०८० भदौ ३१ गते) बसेको मन्त्रीपरिषद् बैठकले दैनिक एक सयको दरले दिँदै आएको खाजा भत्ता विद्युतीय हाजिरीका आधारमा उपस्थिति भएको दिन दैनिक दुई सयको दरले दिने निर्णय गरेको हो ।
यस्ता छन् आजको मन्त्रिपरिषद् बैठकका निर्णयहरू :
(१) संविधान सभाका अध्यक्ष, पूर्व सभामुख तथा नेकपा एमालेका उपाध्यक्ष सुवासचन्द्र नेम्वाङ्गको दुःखद र असामयिक निधनप्रति दुःख व्यक्त गर्दै हार्दिक शोक प्रस्ताव पारित गर्ने निर्णय गरेको छ ।
(२) प्रदेश सरकारका मन्त्रालय, आयोग र निकायहरूको आर्थिक वर्ष २०८०/८१ को अस्थायी सङ्गठन संरचनाका दरबन्दीहरू स्वीकृत गर्ने निर्णय गरेको छ।
(३) सङ्घीय सरकारको बन मन्त्रालय अन्तर्गतका कोशी प्रदेशमा कार्यरत ७४ जना फरेस्टरहरु (खरिदार सरह) लाई सङ्घीय सरकारले अनुमति दिएमा प्रदेशमा समायोजन गर्न कोशी प्रदेश सरकार तयार रहेको जानकारी सङ्घीय सरकार गराउने निर्णय गरेको छ ।
(४) प्रदेश सरकारका कार्यालयमा कार्यरत कर्मचारीहरूलाई प्रतिदिन एक सयको दरले दिँदै आएको खाजा भत्ता विद्युतीय हाजिरीका आधारमा उपस्थिति भएको दिन दैनिक दुई सयको दरले दिने निर्णय गरेको छ ।
